![](https://static.wixstatic.com/media/8d73fb_cd1d8c2d1b9f4bccb8b8fb5d2561cb09~mv2.png/v1/fill/w_980,h_550,al_c,q_90,usm_0.66_1.00_0.01,enc_auto/8d73fb_cd1d8c2d1b9f4bccb8b8fb5d2561cb09~mv2.png)
Durante entradanan hudisial ku a tuma lugá na St. Maarten bou di guia di hues komisario, a detené e hòmber italiano Francesco Corallo di 56 aña. E aresto i entradanan hudisial ta forma parti di un akshon internashonal kordiná entre e paisnan Italia, Hulanda, St.Maarten parti Hulandes i St.Maarten parti Franses. Ta un koperashon entre e Ministerio Públiko-nan di e diferente paisnan. Tim pa kombatí kriminalidat (TBO) i Recherche Samenwerkingsteam (RST) a detené Corallo riba petishon di outoridatnan italiano i Italia lo a pidi pa su ekstraditashon. Corallo ta propietario di diferente kasino na St. Maarten i Kòrsou. E tin akshon tambe den e kasino ku ta pertenesé na Howard Johnson Hotel. E kasino a anunsiá ku lo e sera su portanan dia 18 di desèmber próksimo. Lo pèrsigui Corallo na Italia pa sospecho di froude di impuesto, soborno di diferente polítiko i labamentu di plaka di ganashinan ilegal via di su kompanianan. Durante e entradanan hudisial, a arestá tambe Rudolf Baetsen di 56 aña nasé na Hulanda. Baetsen ta manehá e kasinonan na St.Maarten pa Corallo. Corallo tabata e figurá den un sentensia ku wes a dikta na yanüari último kontra e lider di MFK, Gerrit Schotte. Segun e sentensia Corallo lo a kumpra Schotte. E koperashon internashonal entre Italia, St.Maarten i Hulanda ta parti di esfuersonan konhunto pa intensivá e lucha pa kombatí kriminalidat ku ta krusa frontera manera korupshon, froude i labamentu di plaka.