Marije Vaders, Geert Jan-Knoops i Gary Knoops-Hamburger ta e abogadonan nobo pa defénsa di Parlamentario Gerrit Schotte i su partner Cicely van der Dijs den kaso Babel. Asina abogado Marije Vaders a deklará na korant Amigoe. Esaki ta nifiká tambe ku ofisialmente abogadonan Eldon “Peppie” Sulvaran i Paula Janssen a retirá komo defensor di Schotte i van der Dijs den “hoger beroep”. Ofisialmente Korte di Hustisia tambe ta na altura di e último desaroyo akí. Manera ya ta konosí, djaweps 11 di ougùstus lo trata e kaso Babel den “hoger beroep”. Durante e tratamentu akí, e abogadonan nobo por hasi petishon pa por hasi mas investigashon, entre otro skucha mas testigu den e kaso. 11 di mart último, e pareha Schotte i van der Dijs a keda kondená den Korte di Promé Instansia, pa falsifikashon, labamentu di plaka, poseshon ilegal di “jammers” (aparatonan pa interseptá señal). Ademas a haña Schotte kulpabel di denusia falsu di a pèrdè su pasport diplomátiko i di a tuma sèn pa fabor, siendo den un funshon gubernamental. (korupshon) Despues di e veredikto, abogadonan Sulvaran i Janssen, a apelá mesora. Ademas e abogadonan a pidi Presidente di Korte Evert Jan van der Poel pa laga wesnan di Ulanda bini pa tratamentu di kaso, debí ku nan no tin konfiansa ku nan kliente lo haña un kaso hustu serka wesnan lokal. Segun e abogado, ku tantu atenshon den media pa e kaso i e barera di lenga, por influensiá e desishon di wesnan lokal. Pero Korte a rechasá e petishon.