Esun ku a pensa ku ta den seri di televishon so un promé dama por bira visepresidente, ta kiboká. Na Nicaragua, e kasá di presidente Ortega a ser nombrá su partner di kampaña pa elekshon di 6 di novèmber awor. Esei ke men, ku tin un chèns grandi, ku e pais latinoamerikano lo keda goberná dor di un pareha. I hustamente esaki ta hasi e kaso unu úniko.
E eskoho pa un pareha komo presidente i su kasá komo visepresidente ta laga nos kòrda riba e popular seri di Netflix ‘House of Cards’. Den e seri akí presidente Frank Underwood (aktor Kevin Spacey) tin su kasá Claire (aktris Robin Wright) komo kompañero di kampaña. Despues ku e di kuater parti di e seri a sali na mart último, hopi televidente a puntra nan mes si esei lo por pasa den mundo real. Daniel Ortega, ku ta iskierdista, ta presidente di Nicaragua, un di e paisnan mas pober den region di latino amerika, for di 2006. Promé ku esei e tabata dirigí e pais kaba for di 1979 te ku 1990. Su pareha Rosario Murillo awor ta bosero pa gobièrnu i ta paresé ku regularidat na televishon den e funshon ei. Ortega ta bisa ku nombramentu di Murillo ta pas den e maneho di Frente di Liberashon Nashonal Sandinista. E organisashon ke pa mitar di tur e lugánan elegibel, ta kandidatonan femenino. E oposishon nikaragüense ta ménos entusiasmá. Nan tin miedu ku pareha Ortega lo reforsá e gara riba poder. Un miembro di oposishon ta bisa: “Esaki ta e prueba”.