Wikileaks ta trahando riba un posibel 'hack' ku ta dirigí riba kandidato presidensial merikano Donald Trump (foto). E meta ta pa yega na dokumentonan privá manera papelnan di impuesto. Esaki ta loke e redaktor na kabes di Wikileaks, Julian Assange a bisa den un entrevista ku Bill Maher. Assange a bisa esaki despues ku a kritik'é di ta partidario. Segun Maher, Assange ta trahando ku Rusia pa asina influensiá e elekshonnan na Merka. Assange no a reakshoná direktamente riba e akusashonnan pero a bisa ku ta tratando na optené papelnan di impuesto di Trump. E no a duna mas informashon tokante esaki. Fin di yüli Wikileaks a publiká entre otro email i arkivo di oudio di e partido Demókrata. Di esakinan a sali na kla ku e partido ta'tin preferensia pa Hillary Clinton bira nominado presidensial pa e partido. Di e forma aki, probablemente a perhudiká Bernie Sanders ku tabata e otro kandidato Demókrata ku potensial pa gana e nominashon.