St Maarten lo ta anfitrion pa e di 12 reunion di Caribbean Network Operators Group (CaribNOG) di 24 pa 26 di òktober 2016. CaribNOG ta e promé komunidat di “network engineers”, boluntario di seguridat di kòmpiuter, eksperto den karibe i afishonadonan tékniko. E seminario ku tin un durashon di tres dia, ta parti di un evento mas grandi ku yama Internet Week SX (Siman di Internèt SX), ku ta kontinuá te 28 di òktober. CaribNOG ta organisá e siman di Internèt SX huntu ku the Latin American and Caribbean Internet Registry (LACNIC), Internet Society (ISOC) i tambe e reguladó di telekomunikashon na St.Maarten (BTP). A anunsiá e fechanan di e evento na e di dos foro di Karibe, Caribbean Peering and Interconnection Forum, ku a tene na Kòrsou entre 7 pa 10 yüni último den hotèl Renaissance Resort and Casino. “Na e di 12 reunion regional di CaribNOG, nos ta spera hopi operador di nètwèrk, reguladó di telekomunikashon, akadémiko, proveedor di servisio di internèt, studiantenan ingeniero i studiante sientífiko di kòmpiuter, gruponan di interes speshal i representantenan di gobièrnu, ku ta yega for di region i rònt mundo” asina Bevil Wooding, un di e fundadónan di CaribNOG a deklará.