Ta kalkulá ku mas o menos 45.8 mion hòmber, muhé i mucha rònt mundu ta biba atrapá den un forma di sklabitut modèrno. E paisnan ku e kantidat apsoluto i mas grandi di personanan den sklabitut modèrno ta India, China, Bangladesh i Uzbekistan. Esaki ta resultado di un investigashon di e fundashon Walk Free ku ta midi e indèks di sklabitut mundial. E investigashon a inkuí personanan ku ta biba den kondishonanan di sklabitut laboral òf seksual. Despues di analisá datonan di 167 pais, e informe ta mustra ku Nort Korea ku tin e porsentahe mas haltu di sklabitut modèrno ku 4.37%. Seguidamente Uzbekistan 3.97%, Kambodja 1.65%, India 1.40% i Katar ku 1.36%. Ora analisá sifranan apsoluto ta mira ku India ta sigui ta e pais ku sifra mas grandi di sklabitut esta mas o menos 18.35 mion persona. Despues di India ta sigui China ku 3.39 mion, Pakistan ku 2.13 mion i Uzbekistan ku 1.23 mion. Huntu e paisnan aki ta representá kasi 58% di merkado mundial di esklavo. E dokumento aki ta inklui sifra di personanan ku ta biba den sklabitut laboral i seksual. Tambe e ta mustra riba e riesgonan di sklabitut. Sinembargo e dokumento no ta inklui datonan kompletu di paisnan ku ta den guera of den otro tipo di konflikto. No a inkluí paisnan manera Siria, Irak, Libia, Afganistan i Jemen, pero si lo a hasi esaki e posibilidat tei ku e kantidat lo ta hopi mas grandi. Di otro banda e paisnan ku e porsentahe mas abou di sklabitut den komparashon ku nan poblashon ta Luxemburg, Irlanda, Noruega, Dinamarka, Suisa, Austria, Suesia, Bèlgika, Merka, Canada, Oustralia i Nueva Zelandia. Fundashon Walk Free ta konsiderá ku e trabounan ku prisoneronan ta hasi den e prisonnan na Nort Korea tambe komo un forma di sklabitut i pa e motibu aki e pais ta aparesé na e promé lugá.