BWM lo lansa un vehíkulo ku ta manehá su mes. E vehíkulo aki lo ta optenibel for di 2021 na China. Asina gerente di BMW a informá durante un konferensha tokante inteligensia artifisial. E outonan BMW lo por kore riba avenidanan grandi dor di solamente primi un kònòpi. Na 2025 lo aparesé un vershon ku lo por kore riba tur tipo di karetera. BMW a uni forsa ku Intel i Mobileye pa hasi esaki posibel. Mobileye, un kompania di Israel, ta krea e material ku kua e outonan por ‘mira’ kuné. Nan ta spesialisá den desaroyo di kámara, programa i piesanan pa outo. Mobileye tin banda di BWM kompanianan manera Tesla i General Motors tambe komo kliente. Intel ta enkargá ku e parti di prosesá informashon elektróniko. E kompania aki esun mas grandi den produkshon di chep pa kòmpiuter na mundu. Na 2021 Intel lo introdusí un sèrvisio kaminda shofùrnan lo por kompartí vehíkulonan ku otro.