Twitter a anunsiá ku for di febrüari di e aña aki el a sera mas ku 235.000 kuenta riba su ret sosial ku ta promové terorismo. Na febrüari Twitter a anunsiá ku el a sera 125.000 kuenta, pa un total di 360.000 for di yüni 2015. Den un resiente deklarashon e kompania riba retnan sosial a bisa ku diferente kaminda tabata testigu di un ola di atakenan terorista mortal rònt mundu. Atakenan ku vínkulo òf inspirá dor di e Estado Islámiko a tuma lugá na Fransia, Alemania, Turkia, Irak i Florida entre otro. “Nos ta kondena e aktonan akí i ta sigui komprometí pa eliminá e promoshon di violensia òf terorismo via di nos plataforma”, asina Twitter a bisa. Den e último dos añanan Twitter a haña krítika ku nan no ta hasi sufisiente pa sera kuenta di usuarionan ku ta promové òf tin lasonan ku IS òf otro gruponan terorista. Twitter a indiká ku tin 80% mas suspenshon diario for di aña pasa. E kompania a bisa ku e la ekspandé su tim ku ta repasá informe durante hinter dia. A agregá instrumentonan pa yuda detektá kuentanan sospecho i a empleá personanan ku por papia diferente idioma. E kompania a bisa tambe di koperá ku otro kompanianan riba medionan sosial pa kompartí informashon pa por detektá posibel komportashon terorista.