Den un konferensha di prensa minister di Desaroyo Sosial, Labor i Bienestar Ruthmilda Larmonie-Cicilia a anunsiá ku e ke subi suèldu mínimo na 1.976 florin pa luna entrante 2017. E intenshon ta pa introdusí esaki den fase, pasó ta trata di un subida di 40% kompará ku e suèldo mínimo aktual ku ta 1.420,24 florin pa un persona basá riba un siman di trabou di 40 ora. Sigun e ministerio esaki ta un ahuste demasiado grandi pa ekonomia karga den un bia. Lo subi e suèldo ku un porsentahe bou di 10% pa finalmente yega na e suma di 1.976 na aña 2020. Di tur manera minister Larmonie-Cicilia a kumisá publiká ku entrante promé di yanüari 2017 te ku 31 desèmber 2017 e suèldo mínimo lo bira 9 florin pa ora. Aktualmente esaki ta 8 florin i 20 sèn pa ora. E suèldo mínimo ku e minister ke yega na dje, esta 1.976 florin pa luna, ta igual na e liña di pobresa ku CBS a kalkulá, pa un mayor ku dos yu. Segun e minister esaki ta e tipo di famia ku tin mas tantu na Kòrsou i pa e motibu ei tambe e minister ke yega na e suma di 1.976 florin. E meta di e subida ta pa protehá e trahadó kontra posibel abusu di e dunadó di trabou. Esaki ta un di e metanan prinsipal pa stablesé un suèldo mínimo.