Djamars sindikatonan a bolbe bini huntu pa pone un punto di bista final riba un posibel Wèlga General. E sindikatonan a anusniá den oranan di djamars anochi ku pa djaweps awor lo tin un Wèlga General, si no bin un solushon a korto plaso den e konflikto pa un CAO pa trahadónan di kontratistanan riba tereno di Isla. Un Wèlga General ta sali for di e pensamentu ku tur trahadó afiliá na un sindikato lo pone trabou abou. Ta despues di hopi aña ku lo por tin un Welga General atrobe na Kòrsou. Den añanan nobenta tabatin un Wèlga General di sindikatonan di trahadó den gobiernu ku tabata ke partisipashon den e fundashon pa privatishon, StIP, ku entre tantu a keda disolvé. E sindikatonan afiliá na Sentral di Sindikatonan di Kòrsou (SSK), Sentral General di Trahadornan di Korsou (SGTK) i e sindikatonan ku no ta afiliá a bini huntu durante di djamars durante di dia pa un reunion di urgensia. Tabatin presente miembronan di direktiva di e diferente organisashonnan di sindikatonan lokal. Durante e reunion a bin ku un resolushon ku kada sindikato lo bai konsultá internamente tokante posibel akshonnan, pa despues mas lat bolbe bini huntu pa palabrá un ke otro. Den enkuentro mas lat a disidí ku djapweps lo tin un paro general na Kòrsou. Djaweps mainta 11or tin tambe un huisio sumario ku AAV (kontratistanan riba tereneo di Isla) a kuminsá kontra e Sentral General di Trahadornan di Korsou (SGTK). Mediadó partikular, Randolph Gijsbertha ta den deliberashon intensivo ku representantenan di Isla i asosashon di Kontratistanan (AAV) pa purba yega na un posibel solushon pa evita ku djaweps awor lo tin e Welga General.