E partidonan Forsa Elevá (FE), partido Koperativista i Patriótiko (PKP), Frente Obrero i Liberashon 30 di mei (FOL) i partido Reskate Integral Kòrsou (Prik) no a logra pa medio di un huisio sumario pa haña derecho di partisipashon na elekshon di 30 di sèptèmber awor. E kuater partidonan a kuminsá un huisio sumario kontra Pais Kòrsou pa motibu ku nan ta kuestioná e legalidat di e proseso di sostenementu di lista na Kòrsou. Den nan petishon na hues e partidonan a bisa ku pa motibu ku por a vota únikamente na 6 lokalidat, a krea un inkumplimentu pa e derechi di voto liber debí ku no a duna votadónan sufisiente oportunidat pa duna sosten. A kontrarestá esaki bisando ku e lokalnan di sosten i lokalidatnan tabata sufisiente pa kubri e kantidat di votadónan ku a kalkulá.
Konseho Supremo Elektoral a konsiderá nan eksperienshá di 2003, na momentu ku a asigná lokalidatnan pa duna sosten. Entre otro a konsiderá, repartishon geográfiko di poblashon i konsentrashon di poblashon pa área, pero tambe kantidat di votadó pa lokalidat. Hues a bisa tambe ku na e okashon akí tabatin asta un periodo mas largu pa sostené lista, esta durante 2 dia, for di 8or di mainta te 8 or di anochi i tambe e kantidat relativamente abou ku kada lista mester pa por a partisipá na elekshon, esta 870 voto. Pues 6 lokalidat pa duna sosten no tabata un opstrukshon real. Hues a rechasá e petishon. Durante sosten di lista dia 20 i 21 di ougùstùs FOL a optené 622 voto, Prik 505 i FE/PKP 62 voto.