E korant merikano The New York Times (NYT) a duna su sosten na e kandidato presidensial Hillary Clinton. E korant a bisa ku su kontrinkante republikano “e kandidato presidensial di mas malu den historia modèrnu di Merka.” Ya pa mas di 55 aña e korant ta sostené kandidatonan presidensial demokrat. E último kandidato presidensial republikano ku a haña sosten di NYT, tabata Dwight Eisenhower na 1956. E korant a gaba Clinton komo un muhé, ku durante 40 aña a okupá tur sorto di funshon gubernamental den kual el a eksperensiá tur tipo di problema i a buska solushon pa nan. "E ta un di e polítikonan fuerte di su generashon, ku ta dispuesto pa siña i ta dispuesto pa kambia di rumbo, loke ta hopi skars den un époka di polítika partidista prufiá,” asina NYT a públika. Durante su ocho añanan komo senador i kuater komo minister di Asuntunan Eksterior (Sekretario di Estado), el a laga mira ku e ta determiná i imparsial.