“Nos mester duna Donald Trump un ‘fair chance’, pa asina por bini un interkambio pasífiko di guardia den Kas Blanku. E derota ta hasi doló i lo dura un ratu ainda, pero elekshon nunka no ta bai tokante di ún persona,” asina Hillary Clinton a bisa den e promé reakshon riba su derota den e kontienda pa presidensia merikano. Clinton a papia ku su simpatisantenan, kolaboradónan di kampaña i prensa, den un hotèl na New York. Tabata su promé reakshon ofisial despues di e viktoria sorprendente di su rival republikano, Donald Trump. E anochi anterior a posponé su diskurso na momentu ku su derota a bira eminente. E kandidato demókrata pa vise-presidensia, Tim Kaine, ku a introdusí Clinton riba tarima. Clinton a dirigí su mes spesífikamente na muchanan i hende muhé. El a animá nan pa hasi nan soñonan bira realidat. “Nos no a logra kibra e plafòn di glas na wèrki, pero un dia sí, un hende ta bai logra. Mi ta sumamente orguyoso di por ta boso defensor,” el a añadí. Clinton tabata flankiá riba tarima, pa su esposo Bill i su yu muhé Chelsea. Clinton a kuminsá hopi mas lat ku su diskurso, pasó mester a regla e sala den e hotèl purá purá, debí ku tabata un enkuentro improvisá. Clinton a yama Donald Trump riba e anochi anterior pa felisit’é ku su viktoria. Por sierto ku Clinton a haña mayoria voto di e elektorado merikano, e asina yamá “popular vote”, pero Trump a logra reuní mas delegado i di e forma ei bira presidente.