E presidente amerikano Donald Trump lo kuminsá ku e plannan pa un kòntròl mas severo na frontera ku Mexico i tambe konstrukshon di e muraya na frontera. Fuentenan serka di presidente Trump a informá ku e presidente ta tumando otro medidanan riba tereno di imigrashon. Trump ke purba tambe pa redusí e kantidat di refugiado ku ta drenta Merka. Segun un funshonario anónimo ta konsiderando pa para e pèrmit pa refugiadonan durante algun luna. Mas aleu a papia ku lo stòp ku otorgá visa na hendenan for di paisnan di e religion Islam, manera Irak, Iran, Jemen, Libia, Sudan, Somalia i Siria. Tambe Trump ke pone un prohibishon temporal pa migrantenan ku ta bini di paisnan Mòslem. Tabata planiá pa e presidente mehikano Enrique Peña Nieto bishita Trump, pero Peña Nieto a kansela e reunion. E kontroversial presidente na diferente bia, a uza Méhiko komo sentro di su kampaña polítiko. Trump semper a bisa ku Mexico lo mester paga pa e kostonan di konstrukshon di e muraya. Tambe Trump ke subi tarifa riba derechonan di entrada pa sierto produktonan for di Mexico. Esei ta motibu tambe ku e ke stòp na forma parti di e Akuerdo Nort Amerikano pa Merkado Liber (NAFTA).