Den e siman akí, Iran a bisa ku e prueba di lansamentu di misil ku a tuma lugá resientemente, no tabata intenshoná pa manda un mensahe pa e presidente merikano nobo Donald Trump. Outoridatnan iraní a splika ku for di su serie di ekspreshon polítiko, ya kaba nan konosé Donald Trump hopi bon.
Iran a hasi prueba ku lansamentu di un misil balístiko nobo. E akshon a pone ku Washington mesora a imponé algun sanshon nobo riba Teheran. Trump a tweet ku Teheran ta hunga ku kandela. Iran a kòrta den su programa nuklear, basá riba un trato ku otro super potensianan, pa evitá sanshonnan ekonómiko mas pisá. E agensia di notisia Tasnim a raportá ku portabos di Ministerio di Eksterior di Iran, Bahram Qasemi, a bisa ku e prueba di misil di Iran, no tabata un mensahe pa e gobièrnu merikano nobo. "No ta na nodi pa tèst Sr.Trump debí ku den e dianan ku a pasa, nos a tende su punto di bista riba diferente tópiko kaba. Nos konosé hopi bon”.
Iran a lansa vários misil balístiko for di 2015, pero e tèst mas resien, ta e promé for di dia ku Trump a drenta Kas Blanku. Durante kampaña, Trump a bisa ku e lo para e programa di misil di Iran. Iran a anunsiá, ku lo saka un visa pa un tim di lucha liber merikano por partisipá na e kompetensia Mundial. Di e manera ei Iran a hala atras nan desishon pa prohibí partisipashon di e tim komo vengansa riba e òrdu ehekutivo di Trump pa prohibí entrada di iraní.