E ekspertonan ulandes, ku riba petishon di minister di Kòrsou a bin pa kontrolá InselAir riba e parti di seguridat, ya a bai Ulanda. Den na reportahe na gobièrnu di Kòrsou, nan ta splika ku no a konstatá nada partikular kontra di InselAir. Nan a keda sorprendí ku InselAir tabata disponé di tur papel i tur programa ku un kompania di aviashon mester tin. Tur buki i tur manual ku nan a pidi, InselAir tabata disponé di dje. Aña pasá na novèmber tambe, ekspertonan di KLM a bin auditá InselAir. E rapòrt di e tempu ei ku ekspertonan di KLM a traha a konstatá vários punto ku InselAir tabata falta. InselAir a manda karta pa reklamá KLM mes i outoridatnan lokal. Di otro band e ekspertonan a traha un rapòrt tambe den kuá ta resaltá e defisiensia na CCAA. E investigashon di e ekspertonan ulandes ta indiká ku gobièrnu di Kòrsou tin un trabou hopi duru ku e departamento di aviashon sivil. E departamento aki parse no tin hende ni programa pa hasi e kontrol nesesario.