(foto AD) Djamars a tuma lugá e di dos dia di kaso ‘Babel’, kaminda parlamentario i lider politko di MFK Gerrit Schotte I su pareha ta akusá pa entre otro falsifikashon di dokumentu, entrega di denunsia falsu, labamentu di plaka i violashon di lei di komunikashon.
Tratamentu di e kaso Riba e di dos dia, e prome parti di e tratamentu a bai tokante uzo di ‘jammers’ dor di Schotte. ‘Jammers’ ta aparatonan ku ta keda uzá pa evita ku por skucha yamadanan di telefòn. Den e kaso akí Schotte a disidí pa buska ‘jammers’, na momentu ku el a deskubri un aparato bou di su outo, ku por skucha kombersashon (afluisteraparatuur). Schotte a bisa Korte ku el a buska ‘jammers’ pa su privasidat i no ta unu ku ta stroba señalnan den un area grandi. Schotte a indiká ku e no tabata sa ku esakinan ta illegal. Despues di e parti akí hues a sigui ku tratamentu di denusia falsu tokante su pasport diplomatiko ku a pèrdè. A bin resultá ku su pareha, Cicely van der Dijs a hinka e pasport den un envelòp i wardé den kluis.
Reksitorio Abogado General Despues a sigui ku e rekesítorio di abogado general Angela. El a bisa ku Schotte a hasi su mes kulpabel na falsifikashon di dokumento pa loke ta e fakturanan falsu ku a haña. Tambe Angela a bisa ku Schotte por a kibra kontakto ku Corallo for di promé instante, pero no a hasi esaki. Según Abogado General, den deklarashonnan di e akusadonan e no a haña e impreshon ku nan mes ta haña ku nan a hasi algu kontra lei i pesei kastigu di prison ta e úniko opshon den e kaso akí. Komo tal a bolbe pidi 3 aña di kastigu di prizòn pa Schotte den Korte Superior. Ademas a pidi pa detené Schotte imediatamente despues di e veredikto.
Defensa Durante e di dos parti di dia, tabata turno na abogadonan di e akusadonan pa hiba nan defensa. E defensa lo mester a dura masomenos 7 ora i mei. Abogado Knoops a indiká ku tabatin vários eror den e prosèsverbal. Ademas no por haña e imeil, ku ta e supuesto base riba kua a kuminsá ku e investigashon penal kontra Schotte. E kompiuter ku a risibi e imeil a ‘crash’. Knoops a sigui bisa ku investigashon di e mèldingnan na MOT no tabata legítimo, ya ku esakinan a sosode sin base. E abogado a pidi pa deklará Ministerio Publiko no atmisibel pa tur e erornan ku a keda komete durante e investigashon. E abogadonan defensor a indika ku niun di dos akusado tin algu di aber ku e dokumentonan falsu. Asina por konkluí despues ku sientifikonan di e defensa a komprobá esaki. Ekspertonan a konfirmá tambe ku no tabatin labamenu di plaka. A konkluí tambe, segun defensa, ku e administrashon di Schotte i van der Dijs tabata transparente i ku Schotte no a uza donashonan di Corallo pa su mes. E abogadonan a pidi apsolushon di tur kulpa pa ambos akusado.
(video TV Direct) Presidente di korte a opta na dado momentu laga abogado Knoops stòp ku su defensa i pa sigui ku esaki riba e siguiente dia, djarason.