Willemstad - E gremio di farándula lokal a yega na un akuerdo ku minister di hustisia Quincy Girigorie, pa entrante djabièrnè 19 di yüni, tur aktividatnan relashoná ku farándula por start atrobe,
Pa algun siman kaba un grupo formá pa musiko, artista, doñonan di banda i klup, huntu ku presidente di A.M.A.K., Manfred ‘Feco’ Gomes na kabes, a bin ta reuní ku minister pa mira kon ta atendé ku e situashon den farádula despues di COVID-19.
A yega na e desishon ku tur lugá por habri atrobe pa aktividat entrante 19 di yüni, pero por pèrmití solamente 50% di públiko, basá riba e 'brandweer vergunning' di e lokalidat. E gremio di farándula a boga pa 70% di bishitante, konsiderando e gastunan di operashon i organisashon. Sinembargo pa awor lo mantené na 50% i a keda pa bolbe reuní riba esaki.
Otro punto ta e eksigensia di Ministerio di Salubridat, GMN pa meskos ku na misa, registrá tur bishitante di un aktividat. E gremio farándulero ta konsiderá ku esaki ta bai kontra privasidat i lo por afektá tambe asistensia na un aktividat. Di otro banda nan ta komprondé ku GMN lo mester por ‘trace back’, den kaso ku un hende afektá asistí na un aktividat.
Tur lokalidat mester tin 'hand sanitizer' i demas reglanan general di mantenshon di distansia ta konta nòrmal. Den e próksimo simannan lo bolbe sinta na mesa ku minister, pa mira kon lo por sigui de-eskalá e sektor farándulero.
Comments